中國嘉德今年秋季拍賣會下個月四號開幕，一共有十五場；有古籍善本、有油畫國畫、有古錢瓷器，只要有錢，唔愁冇貨。其中十一月五號上晝拍賣嘅，係「務本堂」所藏嘅中國近現代書畫四十七件，包括林風眠葦塘蘆雁、齊白石花卉對屏、黃賓虹桂林山水、傅抱石松崖觀瀑……
對於中國書畫，八方識得好少，喺度班門弄斧，皆因呢間「務本堂」大有來頭，堂主就係張永霖。
張永霖係打工皇帝香港好多人都知，但呢間「務本堂」就比較少聽聞。佢開始做收藏家，主要得熊海嘅幫助，熊海係楊善深徒弟，係畫家亦係鑑賞家，佢教張永霖主力買近代大師嘅精品。十幾年間，張永霖藏量已頗具規模，前年尾去年初重主辦過「絕色人家──張永霖藏林風眠繪畫展覽」。今次拍賣會，就有四幀林風眠嘅仕女圖出售，估計共值四十至六十萬元。
王雁南負責賣畫
自從離開電盈唔打小小超李澤楷工之後，張永霖曝光率低咗少少。佢自己開咗間公司，得閒上吓電台做節目，幫吓母校港大手，去馬會游吓水，自稱係「藝術欣賞家」。最出位一次，就係今年一月趙紫陽過世，佢親赴北京趙家弔唁，其實都同中國嘉德有關。呢間中國有名嘅拍賣行，領導成員共有五人。曾經喺香港電訊任職嘅邢珠迪，當市務總監；董事總經理王雁南，就係趙紫陽女兒，佢同張永霖相識十多年，又合作搞拍賣網站，所以張永霖去趙家致意，而務本堂賣畫自然係由王雁南負責。
張永霖畢業後，第一份工喺國泰由低做起，做到副董事總經理，係最高級嘅華人，跟住轉投香港電訊，亦係一人之下。做咗幾十年打工皇帝，張永霖搵夠上岸，最大投資就係買畫，記得九四年佢離開國泰前夕，八方上佢太古大廈寫字樓做訪問，全個辦公室都係畫，拆晒落嚟等人搬走，佢重話電訊個房冇咁大，掛唔到咁多。今次佢肯大手割愛，官方解釋係「與同好分享收藏的快樂」，真正嘅原因可能就係冇地方擺，或者想「換吓畫」咁啫。
爆料熱線：29290000、27860099
報料傳真：26239278
報料電郵：[email protected]
