禽流感愈去愈多地方，令人有啲擔心。如果大爆發，影響全球經濟，股市又會點樣？另方面，恒指由10月4日最高位15493碌落嚟，到上周五最低14308，12日內大散接近1200點，跌得太急，可能又已經短期到底。
個市當反覆嚟賭，限注買賣，見再跌一二百點，咪買P輪，見回升一二百點，亦咪買C輪。
滙控C輪3976：滙控（005）上周三最低120元，上周五最低120.20元，收120.90元，估計短期可守百二大關。滙控如果再低試齊頭關口，賭吓C輪，太價外或太短期者咪搞。正路之選，係3409。隻輪明年2月下旬夠鐘，輪價40.5仙，溢價3.7%，槓桿率29.9倍（有效15.3倍），引伸波幅14.9%。搏殺格，則揀3976，壽命短個半月，溢價相若，槓桿率則大到接近90倍，贏輸大好多。
中移動C輪9471：中移動（941）係波幅最大嘅重磅股，掌握佢嘅一上一落走勢，每次跌得重重哋之時，低買C輪9471，咪大貪，有10個巴仙利錢之時，賺錢走去飲茶。隻輪明年3月中到期，輪價26.5仙，溢價10.1%，槓桿率13.2倍（有效10.1倍），引伸波幅32.5%。
章盛