《黑社會》懷舊得浪漫，全片無一個金毛強死臭飛，做大做細的，都有板有眼有character。午夜過後在老尖吹雞辱罵警察叫囂「十二點過後呢度我話事」的地區小嘍囉，電影看到一半，自我感覺羞家汗顏的話，趕快跑去再培訓過才好出來行。
老餅演員個個好戲，大家好自然對比任達華和梁家輝的角色。噢，不是講演技，是角色背後投射的深遠含意。任達華在小圈子「選舉」中，有能者居之，獲得元老級推許。梁家輝市井火爆，夠膽識，也有支持者。其中一個被他收買的，名字叫做串爆，嘴頭犀利，由老戲骨譚炳文飾演。他負責游說元老，充當拉票中間人，角色的存在，頗耐人尋味。
梁家輝以為使錢施壓便做到話事人，誰料元老唔畀面，屬意讓住家男人型的任達華上位。兩個大佬爭奪正印象徵的龍頭棍，少不免來幾場腥風血雨。最後任達華坐正，邀請梁打天下，兩個有錢齊齊搵。不過，當梁提出，幫會可以有兩個話事人，拍住上理事，任便當機立斷格殺勿論。這場戲拍得特別長，梁家輝就特別地「民主派」，提出類似「治港民主化」的分權建議，即遭逢不測。梁家輝天真地以為在分餅仔遊戲中，既然已經分到大餅，再不妨要求多些，等我幫你分。要求07/08雙普選的人，可以參考梁家輝的「下場」。導演挺鬼馬的，有心裝載，梁的貼身馬仔，名字就叫做「長毛」。梁家輝叫「大D」，DforDemocracy，叫到點大，都係劫數難逃。