早前，筆者有朋友突然來電求救，話佢部歐洲品牌的轎車在行駛途中，車頭引擎艙突然砰的一聲，之後冒出陣陣白煙，及後將車駛近路旁停低，打開車頭蓋，方發現引擎連接水箱的喉管爆開，大量帶有淺綠色的熱水徐徐流出；筆者立時吩咐朋友將引擎關掉，以免因引擎失去冷卻水而燒壞，繼而只有幫佢打電話搵拖車喇！
記者、攝影：陳偉林
天氣轉凍，引擎水喉經常在短時間內冷縮熱脹，特別容易有呢個問題，至於話汽車行駛當中，為何會有爆喉的問題發生，筆者向改裝車專家Tony請教，佢話尤其係上咗年紀的歐洲車，夏天悶熱而潮濕的天氣，令原裝水喉壽命會變短，冬天一來，就容易發生引擎艙爆水喉意外。
原裝喉頂多用五年
其次，好多車主都會忽略汽車引擎冷卻系統的重要性，平日要留意水溫表有無異樣外，引擎艙有咁多長期受住高溫的喉管，既有輸油喉，又有傳動水冷引擎的喉管，若然一不留神的話，隨便一條細小的喉管爆裂，都會影響到正常的汽車駕駛；用來冷卻引擎的水冷液，亦需要定時檢查是否需要更換，如果經常激走的話，可以換上一些特製的高壓水喉。而原裝喉用過二、三年最好就更換一次喇，如果部車有五、六年車齡的話，更加要注意。
