呢期大市相當悶，好彩重有一批大陸消費股可供炒作，半新股永樂（503）、雨潤食品（1068）等表現不俗，就連國美電器（493）亦於上周五進行大反撲，升8%，收4.70元。
雖然國美現價相對於52周高位仍有一大截距離，但顯示喺呢個調整市中，個別行業仍有芬佬支持。
另外，經紀陳又提到泛海集團（129），話隻股有一定留意價值。早排泛海旗下嘅泛海酒店（292），無厘頭由幾毫子急升至２元，之後又無厘頭勁跌番落去2毫子水平，一度成為股市熱門話題，而作為阿媽嘅泛海亦受牽連，一度跌至近52周低位。
經紀陳話，其實炒開泛店班炒家，與泛海嘅支持者唔係一班人，過往泛店勁升時，泛海股價唔算升得多，理論上泛店勁跌時，亦不應影響太大，但有時投資者嘅心理就係咁，見人哋沽佢又沽。若以泛海現價與資產值相比，折讓大到離晒譜，公司有錢賺又有息派，受泛店急跌牽連並唔公平。
泛海上周五升5.7％，收0.275元，成交股數973萬股，金額260萬元。
慕容小初