呢日出街開會，兩個鐘頭後返到寫字樓，工作枱上多咗三本新書，秘書話Ｆ博士上來講打招呼，贈書三本，以供參考云云。
講起Ｆ博士，有啲感慨，當年左丁山提醒佢，大學有空缺，啱佢嘅資歷，可以申請。以佢嘅帝國學院一級榮譽學位，牛津大學分子科學博士學位，及豐富科研經驗，返大學統籌中藥研究，佢得到職位，並不稀奇。最令朋友諗唔通嘅，佢做得好好哋，竟然誤用公款，雖已全數歸還，還是要坐監一年。時間過得好快，兩個月前佢已經出獄，點解會有書相贈呢。
打開佢寫嘅《全面認識靈芝雲芝》、《從黃帝內經到分子中醫藥》、《纖得健康—五合一減肥法》，內有前醫管局專業事務及人力資源總監高永文醫生，理工大學應用生物及化學科技講座教授陳新滋嘅序言；裏面嘅作者簡介話：Ｆ博士於懲教所服刑期間編寫呢三本書。Ｆ博士在前言話：「在獄中生活雖不像電影中所述的那麼恐怖，但也不是容易。但從正面看，這次的經歷卻使我作了一次深切的反思，使我學習到如何處理恐懼，如何處理失敗，如何調節自我精神狀態與如何處理及善用逆境。藉着主耶穌基督給予我的勇氣、方向及賜我有更生會黃牧師及家人、朋友們的鼓勵，我在這裏感謝主，使我可以利用在獄中期間的時間，將自己所學、所知及專業寫成了三本書。」
識Ｆ博士七年，以前唔知佢係基督徒。就算以前唔係，人在獄中，需要精神支持，就信奉主耶穌，希望以佢嘅學識，專業經驗，吸取坐監教訓，以後更加好好咁貢獻社會。朋友之中，劍橋博士Ｙ，特許會計師財務Ｃ都係虔誠教徒，慣常到教堂做義工。財務Ｃ離開中環花花世界後，視賺錢如浮雲，專心侍奉主耶穌，成個人冇晒以前的霸氣，朋友嘖嘖稱奇。左丁山唔係教徒，仍然覺得教會改變人之面貌與精神，十分有效，值得佩服。