對於一眾動漫迷，《攻殼機動隊》可以代表了科幻動畫經典！不過對於後生一輩嘅動漫迷，可能對02年套TV版《STANDALONECOMPLEX》較熟悉吧！今個星期碟場新返咗佢嘅續集《攻殼機動隊S.A.C.2ndGIG》（10隻DVD共26集），公安九課將面對繼「笑面男」後，更棘手嘅「個別的11人」，以近期熱門社會及政治衝突為引，再加一浪接一浪的恐怖襲擊，真係比上一輯打得更燦爛緊湊，加上dts5.1靚聲效同有粵語配音，動漫迷必撐！
記者：梁瑋瑜
《攻殼機動隊》原著係一套由士郎正宗創作嘅SF（ScientificFiction）漫畫，喺2002年押井守將佢改編為動畫《攻殼機動隊S.A.C.》，得到一眾動漫迷高度評價，去到2004年，原班人馬再次製作續集，亦即係今日介紹嘅《攻殼機動隊S.A.C.2ndGIG》，有傳聞神山健治𠵱家又製作緊新一輯《攻殼》，呢個雖然有待證實，但可以睇得出《攻殼》系列幾咁受歡迎。
電子改造人「公安九課」
講咗咁耐，究竟《攻殼機動隊》係講咩嘅呢？故事背景係未來嘅日本，而「攻殼機動隊」其實係指一班叫做「公安九課」嘅人，佢哋係直屬內相嘅獨立特務組織，以荒卷大輔為領導人，主要負責打擊電腦罪行、保護重要人物、暗殺、揭發政治貪污、調查大型兇殺案等任務。
「公安九課」最特別嘅地方，係每一個成員都經過不同程度嘅機械改裝，更內置電子腦，方便佢哋進行任務時互相交流資料，佢哋重有一個叫做光學迷彩嘅功能，隨時可以隱身到連紅外線都探測唔到，勁到咁，唔怪得政府會委以重任啦！
難民問題 恐怖襲擊
《攻殼》嘅主題一向好有政治色彩，今集《攻殼機動隊S.A.C.2ndGIG》環繞嘅係難民問題（或者講佢係社會中的弱勢社群大家會明啲），故事嘅開始係中國領事館畀一班自稱為「個別的11人」嘅武裝集團佔領，而且重脅持咗多名人質，由於事態嚴重，政府決定讓喺上一集「笑面男」事件被勒令無限期暫停嘅「公安九課」再次出動！
隨後「個別的11人」繼續發動恐怖襲擊，喚醒咗好多人對難民問題嘅關注，「公安九課」點樣對付「個別的11人」，為社會帶來和平呢？就留番畀大家慢慢睇喇。喺今集攻殼車都會出現，想一睹攻殼車幾咁高科技同埋有智慧，記住捧場喇！
必睇Bonus
獨家訪問片段曝光
今次《攻殼機動隊S.A.C.2ndGIG》推出嘅BoxSet有上下集，總共10隻DVD收錄咗總共26集TV版動畫，有心機嘅話睇足13個鐘就可以煲得晒！DVD分別有日語同粵語對白，以及中英文字幕，唔想聽日文睇字幕嘅，可以揀粵語配音，呢一點值得一讚。
每一個BoxSet都加送一隻BonusFeature嘅DVD，收錄咗監督、導演訪問，場景及人物設計訪問等，今次BoxSet絕對獨家，非常之有珍藏價值。原來《攻殼機動隊S.A.C.2ndGIG》花咗三年時間總共八億日圓製作，咁大堆頭大家點可以錯過？
Profile
規格：DVD-9
區碼：3
發行：鐳射
DVDPro（23326326）
地址：旺角奶路臣街6E德發商場地庫B4舖
