星期五中午食飯時間，皇后大道中上人頭湧湧，置地廣場嘅文華酒店係有錢有面人士嘅「新蒲點」，裏面間Amber日日滿座。一次碰到名太Ｌ、名太Ｌ話：「有咗置地文華真係好，好就好在有停車處，我架車一駛入去，我個司機唔使落地，文華啲夥計已經同我打開車門。我入去置地廣場Shopping，從HarveyNichols出嚟，又可以預早call定司機喺置地文華外面等我，幾妥當呀！」左丁山回答：「咁有冇幫襯吓文華呀，人哋咪蝕本畀你？」名太Ｌ話：「梗會啦，行行吓街，咪入去MOBar飲杯嘢囉！」
呢日見唔到名太Ｌ，點知鄭大班喺Amber食晏，食完就急急腳去機場，坐飛機返鄉下溫哥華。鄭大班為咗做立法會議員，放棄加拿大護照，但係為咗推銷珠三角，佢特登飛去溫哥華幫手。廣東省長黃華華率領咗一個代表團，浩浩蕩蕩出外做路演，第一站係檀香山，跟住係三藩市、南美洲、溫哥華。曾特首會到溫哥華與黃華華滙合，一齊宣傳珠三角。然後曾特首會到紐約、華盛頓訪問，一個唔覺意，可能與布殊總統握手㖭。
立法會議員之中，鄭大班與石禮謙都會參加。咪以為鄭大班對珠三角所知無多，其實三年前佢嘅老友鍾普洋已經出錢出力，成立一個香港珠三角基金會（HongKongPearlRiverDeltaFoundation），請咗葉松茂博士做CEO，鄭大班係研究成員，今次去溫哥華講珠三角，佢一啲都唔生疏。
不過，特首與大班會在海外締造歷史新猷，就係星期日（十月二十三日）下午三至五點（溫哥華時間），兩人在「華僑之聲」電台對話，大班訪問特首，歡迎溫哥華港僑打電話向特首訴心聲。唔講唔知，「華僑之聲」電台係鄭大班喺七十年代參與創辦嘅，現任CEO係中文大學新聞系畢業生屈潔冰。大班喺香港冇電台搵佢做節目，估唔到會喺溫哥華開咪，訪問曾特首也。