林家棟在大銀幕盡演反派，在近日上映的《黑社會》中，他飾演大圈東莞仔，在眾多好戲之人包圍下，他仍能突出搶鏡，家棟不期望憑此片獲獎，只希望票房好有口碑。有杜琪峯這位伯樂，劉德華做練馬師，家棟卻不心急做主角，反而希望演過癮的角色。
事業篇：登大銀幕壞事做盡
林家棟入行十八年，在無綫浸淫了十三年後，投身大銀幕至今，盡是演賊人、黑幫人物或鄉下仔之類，連在《童夢奇緣》演副校長，也是個奸角，在《無間道》中演警察，卻是個卧底，家棟最想演個有正義感的警察，可是，看罷其有份演出的新戲《黑社會》，裏頭飾東莞仔的家棟，穿夢特嬌Tee恤襯黑皮鞋，還佩戴粗金鏈，入型入格。
去砵蘭街學藝
《黑》片中配角多得很，張家輝的癲喪與張兆輝的漏口都很易搶鏡，王天林和譚炳文等老戲骨亦非等閒，相對之下家棟的大圈仔角色很難出位，可他的演繹卻讓觀眾留下深刻印象。家棟說：「造型方面好幫到我進入情緒，個角色係無聲狗，導演叫我唔使演得太出，有時over咗少少，佢都會㩒番我。我自己都有做功課，有時會半夜一個人揸車去砵蘭街、德興街一帶，觀察四周圍嘅人同佢哋嘅言行舉止，可以睇到好多嘢。」家棟演這個「無聲狗」角色甚獲好評，即使身邊盡是好戲之人，他也能一口咬死你，家棟的表現會否被提名金像獎「最佳男配角」？他說：「獎唔獎唔到我講，有提名有獎係bonus，個個都想做影帝，但唔係努力就得，可以同我欣賞嘅導演同咁勁嘅演員合作，出嚟反應好就夠晒。我追求口碑，呢部係三級片，我最想係票房好。」
腳震震頂硬上
一場好戲，付出的都是血淚，家棟用大樹幹狂打林雪的戲份，刺激得幾乎能挑起觀眾的獸性，家棟表示該場戲拍了兩日，打與被打都辛苦。家棟說：「條樹幹係木嚟㗎，導演一方面叫我大力打，唔使就住，唔係打成日打死林雪都未拍完，一方面又安撫林雪，話佢知冇事嘅，頂住呀咁。我攞住碌木感覺好怪，唔係幾好意思，我由朝早打到晏晝，林雪真係瘦咗一圈㗎，嗰度啲草好尖，佢爬下爬吓咁真係流晒血，導演一叫cut，我咪攞張紙巾幫佢印吓血水囉。」家棟打林雪之前，演一場在草叢中狂追林雪的戲，當時他穿着皮鞋邊撥開高草邊狂奔，拍了半日已累得雙腳發抖，但又要裝作沒事，家棟拍完該場戲，大腿痛了三日。
付出是否必然有收穫？有時也要看伯樂，家棟早前便得杜琪峯賞識，帶他出席康城影展，家棟說：「阿杜對我真係無話可說，佢係我好欣賞嘅導演，千里馬都好睇伯樂，一個好導演可以發掘演員潛在優點。杜琪峯、張之亮同關錦鵬都係我最鍾意嘅導演。」家棟愛杜琪峯，即使連拍戲沒劇本也覺得是享受，他說：「我每日去拍嘢時嘅都好緊張，唔知今日做乜嘛，大家一見到導演架車到，就豎起晒天線等佢講解，我好滿足個拍攝過程。其實佢要一早畀晒劇本你唔難，但佢就係要你一知道自己要點演時嘅第一個感覺。」
華仔電話教路
如果杜琪峯是伯樂，劉德華應該是家棟的練馬師，與華仔簽經理人約，家棟覺得是個好選擇，他說：「我同佢經歷幾似，大家都喺無綫出嚟，佢經歷比我豐富，可以做我嘅明燈，有啲戲唔知接唔接好，佢會幫我分析，我哋通常用電話聯絡。」家棟恨不恨做主角？他說：「個個都恨㗎啦，但我唔心急，主唔主角係靠天時地利人和，你唔知幾時做個角色會爆咗出嚟，我反而恨做多啲過癮嘅角色，好似《黑社會》咁，睇嘅都話過癮，我哋拍嘅咪重過癮，好似洪羅拔做fing頭大佬個角色，我都幾想做㗎。」
