祥泰行（199）呢個月發咗兩段公告，聞到有味，昅實。祥泰行呢個月7號發公告，話集團及透過配售代理，發行咗批總額10億銀嘅可換股票據，重未獲持有人兌換。呢批票據數額唔細，正股每股兌換價0.44元，持有人蝕機會成本兼暫時蝕章，不在話下，呢期唔少市值奀大股東又揸得少權益嘅三四線向下炒，合股兼供股。睇番祥泰行市值1.6億銀，亦無主要大股東，不過，單係票據已集到巨額，持有人包括爆棚哥、何厚鏘又全部猛料，免卻不必要疑慮，祥泰行市值細細，反而係優勢。對上星期二，集團發咗個公告，話不悉成交量急升理由。睇番當日成交股數高達18球，相信市場炒賣焦點，仍然圍繞集團馬交拓展大計，睇成交，春江鴨味濃。對上一次品題祥泰行係9月2號，當時建議0.38至0.42元炒波幅，呢勻唔定價，自由發揮。
百利保再跌博反彈
百利保（617）同呢期好多二三線地產股一樣，陰乾跌，再跌博反彈，又講兩點：第一，百利保最新NAV0.56元，現水位0.163元資產折讓講緊已經7成，齋秤NAV，開始吸引。第二，百利保10年前以2.3億銀購入總樓面上百萬平方呎嘅鴨脷洲地皮，99年以3.9億銀將地皮7成權益賣畀新地（016）及嘉里（683），百利保家陣揸住3成權益，係免本製作。呢期有報道話，地皮已獲補地價兼即將啟動，豪宅單位項目最快明年底推售，before真係回籠，百利保有talkingpoint。股價跌近0.15元撈底，博升兩成到0.18元，NAV折讓重高達67%。
錢雋