在香港道路上行走嘅汽車，如果有咗六年車齡，就要每年到政府指定驗車中心驗車。好多車主怕麻煩，都會交由車房代勞，車房有理無理，一於整個套餐畀你，全包價錢約由$1,500至$2,500，不包其他維修。其實𠵱家嘅汽車好先進，六年驗車唔係太大問題，只要花十五分鐘時間，檢查一下你部車，無乜問題的話，可以自己直接去驗車，慳唔少錢㗎。
記者：伍旋卓
政府驗車裏面，項目有好多，但當中有幾個係驗車嘅重點，你自己一定要知，當然喇，發現有需要修理，一定要搵信譽可靠嘅車房幫手，唔好自己搞。
1.和尚頭：前驅車頭轆要轉向，又要有動力，而驅動軸嘅連接位就係和尚頭，要檢查其實好容易，只要升高個前輪，用手搖吓個車輪有無鬆或虛位就知道。
2.BallJoint塵冚：一個好似彈弓咁嘅膠冚，防止沙塵走入和尚頭，呢個塵冚唔可以破裂。
3.引擎座膠：即係引擎座嘅避震軟膠，一般有三個，部份車有四個，避震膠唔可以破爛或出現裂痕。
4.制動系統：睇睇制動分泵有否漏油，而煞車手掣不能太鬆。
5.車軚：車軚最少要有1mm嘅軚紋，左右軚紋要對稱。
6.車身：車身包括車底，都唔可以有生銹位。
7.漏油：引擎、冷卻系統和制動系統唔可以有漏油或漏水。
安全帶：要有正常操作。
電器：包括指揮燈、水撥、車頭燈、死火燈等。
砵砵：好重要，又好多人唔記得檢查嘅砵砵響按。
如果以上嘅情況都正常，不妨自己攞部車去驗，政府驗車費$530。
查詢政府驗車中心和預約： http://www.td.gov.hk/information_for/motorists/index_tc.htm