呢排間間大學都搞緊開放日，除咗為準備報大學聯招嘅中七生提供資訊，實質就係鬥吸引最優秀嘅學生報讀。今年嘅焦點，莫過於港大法律學院同明年先開辦嘅中大法律學院嘅龍虎鬥。
港大噚日舉行開放日，法學院請嚟校友兼立法會議員梁家傑演講，二百個位一早坐滿晒，連樓梯都企滿晒人。梁大狀講完讀書情況後，結尾用英文講咗句：「如果你哋想讀法律，就諗吓港大啦！」出晒口幫母校「拉客」，但佢又話冇針對其他院校喎。
八方問咗幾位嚟參觀嘅學生，佢哋梗係話首選港大法律學院啦，原因係港大法學院歷史耐，資源多，又有地位，新辦嘅法律學院冇得比喎，唔怪得院長陳文敏話佢哋競爭對象唔係本地院校啦。不過八方心諗，港大如果唔緊張，就唔使搵傑哥呢位星級校友返嚟坐陣啦。
無論如何，兩大之爭都爭咗幾十年，噚日港大開放日嘅安排睇落都有啲衝住中大嚟做。中大校長劉遵義話要搞國際化，港大前日就先公布校內有三千名非本地生，跟住噚日喺開幕儀式上，校長徐立之專登着番件珍藏唐裝衫，拉埋成班外籍學生出嚟「曬冷」畀劉遵義睇。
口號比賽內容健康
另外，港大九間宿舍嘅學生噚日喺開放日玩嗌口號比賽，呢項比賽一向都被宿舍視為每年一度嘅盛事，氣氛非常熱烈，而且全部口號內容健康正面，吸引咗幾百人喺中山廣場圍觀，結果由全男班嘅大學堂贏得冠軍。睇嚟中大每年「四院互片」嘅搞手要參考吓，咪再叫埋啲淫褻口號。
徐立之又話，港大百億擴校計劃所揀選嘅地方本來係一個貯水池，樹木少到可以數得出，所以唔怕會好似城大咁，出現反擴建斬樹風波。
爆料熱線：29290000、27860099
報料傳真：26239278
報料電郵：[email protected]
