三十九歲的林家棟出名孝順母親，原來林母獨力養大八位子女，歷盡淒酸，辛苦又偉大。家棟說：「佢洗碗洗到扭親都要繼續洗，𠵱家隻手指係歪㗎，我細個時父母分開咗，老竇喺我讀完藝訓班時就去咗賣鹹鴨蛋囉。其實我都有反叛時候，中學時成日同班同學四圍玩唔返屋企，唔識諗囉，後來出嚟做嘢，受過委屈撞過板，先明白阿媽嘅感受。」
「我唔係基㗎」
家棟入行至今鮮有緋聞，也沒聽說他有女友，結果被懷疑是同性戀，家棟笑說：「早前去泰國宣傳，啲人話我全程好乖，見到女仔都冇反應㗎。我之前見到余子明，佢問我幾時結婚，話聽啲人講我係基喎，重問我係咪真，我話：『子明哥，連你都聽佢哋講？唔怪得話是非圈啦，我絕對唔係呀。』」家棟坦認幾年前曾與一圈外女子拍拖，八個月後分手，女友無法接受他以事業為先，他也難忍對方的主觀性格，事情總以自己角度去想。
怕被綁愛自由
年邁母親有否心急催婚？家棟說：「佢前兩日先唔覺唔覺咁行過我面前，突然好平和咁講咗句：『搵番個伴啦。』我梗係知乜事啦，我細佬都結咗婚，想飲新抱茶都飲過啦。𠵱家我事業行先，我唔鍾意俾人困住，要自由。」問家棟擇偶條件是甚麼，他竟說：「我聽過心理學家講，自己都諗過，係咪要搵個似阿媽嘅呢，因為我習慣同阿媽嘅相處，如果有個女仔有七成似都好呀。冇女仔咁捱得？我都知唔合乎𠵱家社會，但唔好拍埋差太遠。」說到尾其實是還沒遇到個讓家棟願意付出時間的對象。
採訪：蔡如玉
攝影：陳偉權
場地提供：de.sitecafe
