公子Ｃ喺御用飯堂請食飯，食客有佢嘅公司職員、顧問，及人客。公子Ｃ喜歡定期與新相識、舊朋友交流，食飯地方當然係在佢哋集團所擁有嘅酒店。
坐響左丁山旁邊嘅係一位年輕靚女，從事財務、市場推廣嘅顧問工作，年紀輕輕就做顧問，梗係有啲來頭，否則邊度會咁有信心。呢位靚女Ａ話自紐約返嚟，最初想返回銀行工作，後來覺得外間海闊天空，不如闖蕩江湖，增進經驗。今時今日，喺香港做顧問，點可以唔去上海、北京吖，靚女Ａ話佢周時飛嚟飛去，比打銀行工刺激得多。
隔日，靚女Ａ約食午飯，佢上午去深圳，中午喺邊境過關之後，直衝中環，食完飯就趕去機場去上海。左丁山見佢趕得咁匆忙，自己都有啲壓力感，食到咁上吓就睇時間，驚佢趕唔切去機場，好彩香港機鐵效率，世界第一，二十三分鐘就可以載人由金融中心區去到赤鱲角，方便之至。
靚女Ａ開口就話佢因為讀過左丁山一篇專欄，故此入咗哈佛讀MBA，嗰篇專欄影響佢以後一生。左丁山為之嚇咗一跳，日日寫遊戲文章，竟會影響到讀者前途，責任實在太重。靚女Ａ細說來由：「我九六年港大畢業後就入咗銀行，不久就奉調去紐約，到咗九九年，我阿爸自香港寄來一篇左丁山專欄，好似係講讀MBA與哈佛嘅，阿爸叫我細讀學習。讀完之後我就下決心申請讀MBA，後來揀咗哈佛，就係咁！」
有哈佛MBA銜頭照住，唔怪得可以做顧問，勢估唔到，左丁山文字，竟然產生如此效果，以後下筆係唔係要小心謹慎啲呢？太謹慎，寫稿會窒住窒住噃，聽完靚女Ａ之言，有啲感觸㖭。當然並唔係睇完GG細語就可以入哈佛商學院，要係叻仔叻女先至掂，但如果本欄能夠起咗一啲啟發作用，激發年輕人勵志向上，於願足矣！