前日經紀黃講到大市投資氣氛唔就，連紡織股龍頭福田實業（420）嘅股價亦屢創新低，連大股東增持都於事無補，隻股昨日再跌7.2％，收2.90元，成交股數503萬股，金額1504萬元，走勢相當肉酸，似乎芬佬尚未沽完。
經紀黃又話，聽講除咗傳統基金沽貨外，重有對沖基金一路借貨拋空，令跌勢加劇，唔知佢哋幾時先至肯停手？
此外，經紀黃又話，與福田情況相類似有建滔化工（148），同樣大股東哥哥近期密密增持，而且唔少證券行對建滔嘅評價唔差，但投資者唔like就係唔like，沽極都唔完。
有分析員見過建滔管理層後，話預期覆銅面板銷售強勁，而收購依利安達後的業務整合，可令盈利改善。雖有分析員睇好，仍然難改部份基金對工業股後市睇淡。建滔近排同樣出現有人借貨沽空的現象，但就冇福田咁明顯，影響亦冇咁大。
建滔昨低見16.75元，收17.45元，跌1.97％，成交5660萬元。
慕容小初