鄭伊健和梁詠琪的分手傳聞近日鬧得熱烘烘，雖然GiGi多次否認，但仍未能制止傳聞，伊健接受記者訪問時，開腔強調與女友感情一直穩定，自己亦從來不會對感情事講大話。
共度生日
伊健說：「今年生日我哋都一齊同成大班人食飯，佢當日早機飛返香港，都唔明點解喺機場冇人影到相，佢架車返匡湖居又冇人見到，其實我同佢拍拖，同普通人一樣會行街、食飯、shopping，平時又會踩吓單車，不過歷年來都冇記者影到相啫，我強調我唔係想挑戰狗仔隊，亦唔想拖住手出嚟畀大家影相，我覺得咁樣做好老套。」
問到分手傳聞可會影響二人的感情？伊健說：「有好嘅影響亦有唔好嘅影響，唔好嘅係本來簡簡單單兩個人拍拖，俾外界高度注視會壓力大，好嘅係兩個人都會更加為對方設想，互相包容。」
採訪：張止寒
攝影：仇志德