噚晚四季酒店開幕，八方碰到政協常委陳永棋，問佢點睇肥龍個政改方案同煲呔新政權。棋哥係俊傑之首，當然最知行情。佢同八方講，煲呔同肥龍可謂「最佳拍檔」，好難再搵到咁嘅配搭。
至於肥龍提出嘅「不能改建議方案」，佢就舉手贊成。棋哥重爆料話，其實早前佢哋見過煲呔，要求佢將所有百幾個政協都放入選委會做政界代表，但係因為煲呔要取得民主派支持，所以就只係加咗兩個位畀政協，而區議會嘅成員就入晒去。
當然棋哥認為政協重要啲啦，佢形容政協為顧全大局冇出聲，都希望民主派同香港人都一樣，𠵱家已經整咗煲雞燉翅畀大家食，唔好一定要雞鮑翅先至肯收貨。
傳真︰2623-9278
電郵︰[email protected]