馮仁昭四圍超：阿叻、蔡安蕎去派對見光即彈

馮仁昭呢排成日去蘭桂坊蒲，周不時都撞到好多名人，前晚就喺鏞記門口見到阿叻陳百祥同久違咗嘅蔡安蕎，兩個似乎大纜都扯唔埋嘅人，原來係相識嘅，不過佢兩個一見馮仁昭就即刻彈開，蔡安蕎重雞咁腳走前幾步，其間邊用頸巾同手遮面，邊叫馮仁昭唔好影相。

勉強影合照

蔡安蕎咁樣避法，搞到企喺佢後面嘅阿叻好鬼尷尬。馮仁昭問佢哋去邊，阿叻話佢哋要去朋友嘅生日會，唔怪得兩個都執到靚一靚啦。當時阿叻同蔡安蕎所企嘅位置已經隔咗幾個身位咁遠，於是馮仁昭叫佢兩個影張合照，蔡安蕎笑得好尷尬咁話：「你哋問阿叻啦！」阿叻就話冇所謂，於是兩個企埋一齊勉勉強強咁影咗張相。