六年來一直自負盈虧不需外求的「寵愛行動」，在紅磡有一個狗場，收養被遺棄的狗隻，不過由於資助人廖雪琪因癌病去世，令這家狗場無法再支持下去，令餘下超過30隻未有人領養的唐狗，正面對被送去人道毀滅的危機。
記者：曾靜茵
攝影：陳陶鈞
從地獄拯救出來
全個狗場現時只餘下義工Peter負責照顧狗隻，對着狗場內每一隻狗，Peter都有所感觸，因大部份都有佢自己的故事，有些更是經愛護動物協會及警察幫助下拯救出來的寶貴生命，而混種西施樂樂就係其中之一。「1年幾前，從朋友口中得知有隻狗成日被主人虐打，起初救佢出嚟嘅時候，佢好怕陌生人，只要你拎起隻手，佢就以為你會打佢。」幸好，經過Peter的悉心照顧下，樂樂在半年前經已開始肯接觸人，近幾個月，更會撩陌生人玩㖭！不過Peter話，始終佢曾經被人虐待，當去到另一個陌生環境的時候，都可能要重新適應，所以領養的家庭一定要好有愛心接受佢嘅過去，同埋最好無小朋友。
Peter勞氣有理
經過各方的協助，其實狗場內的小狗大部份都經已被人領養，不過就餘下約30隻唐狗無人問津。訪問當日，眼見Peter的電話不斷響起，大部份來電者第一句便是：「重有無細狗呀？」又或者問：「有無史納莎呀？」Peter都覺得好激氣，覺得香港人就是這樣，從來看見名種狗或者細狗覺得個樣好得意先至會養，反之對唐狗永遠都有歧視的目光。
領養狗隻須知
1.須提供住址證明，證明不是公屋或居屋住戶。
2.幫助未絕育的狗隻做絕育手術。
3.要願意照顧牠終老。
愛心個案
唐狗都要上Course
帶隻唐狗上TrainingCourse？大部份人聽到之後都會話：「使唔使呀！」曾經受人歧視的Winnie就覺得，唐狗都係狗，都應該要學習，點解啲人會對狗的品種都有歧視。「上TrainingCourse嗰陣，有其他主人問我隻狗係咩品種，我話係唐狗，有啲就即刻彈開，重要立刻拉開佢隻狗，好似當我同隻狗有病咁。」
被遺棄過更忠心
現時家中有3隻狗8隻貓的Winnie，其中唐狗樂樂B是從ARS的狗場中領養，而混種哥基短腳虎是流浪狗，另外還有被鄰居不善對待的金仔。Winnie不覺得唐狗一定要困喺屋企，所以她亦經常帶牠們出外活動，而牠們亦很受控制。「可能流浪狗隻曾經被人遺棄，佢哋好似會識得去感恩，比其他狗更忠心。」
第一件事係絕育
當養短腳虎時，牠患有心絲蟲病，Winnie足足花咗4個月先醫好佢，不過好多人都唔花錢帶狗隻去睇醫生，尤其是流浪狗，不過Winnie覺得用幾千蚊去買狗，不如用嚟救番一隻狗的生命會更有價值。另外，Winnie家中的貓狗都經已做了絕育手術，她認為絕育先至係控制流浪狗數量的最好方法。
開狗場要諗清楚
愛護動物協會公關及傳訊經理顏綺苓表示，養狗之前都應先想清楚自己是否適合養，千祈唔好因為貪佢夠得意；另外她建議無論領養狗隻或狗主，可報讀訓練班，一方面可讓狗隻適應都巿的生活，另一方面狗主亦要學識怎樣去令狗隻服從。
除此之外，她發現社區現時都有很多愛護動物者自組狗場，收留被遺棄的動物，不過她認為開始時應先考慮清楚，因為一個狗場的運作，雖要有足夠的設備及資金，否則到最後受害者始終是狗隻。
講心唔講金
由於現時狗場的資金緊絀，所以未能幫所有流浪狗做絕育手術，所以Peter要求領養者需要負番狗主應有的責任，就是幫未絕育的狗隻做絕育手術。其實現時狗場最需要的不是資金，而是糧食，因為牠們每天都需要約50磅的乾糧，若果有人願意領養或捐助乾糧，可致電62896986與Peter聯絡。