近年Tecmo至出名嘅遊戲有《DOA》，用美少女包裝吸引機迷，其實Tecmo製作動作格鬥遊戲都有一手，喺任天堂時代就已經有一班忠實Fans名作《忍者龍劍傳》就係其中之一，其最新系列《忍者外傳》早前已經登陸XBOX，今個星期再推出新一集《黑之章》，除咗收錄全系列劇情同模式外，最特別係有埋多年前街機出過嘅《忍者外傳》，機迷除咗享受到至靚畫面，亦可重溫經典之作。
記者：許福合
《DOA》忍者做主角
話到明係《忍者龍劍傳》嘅新作，遊戲主角當然係以忍者為主，今集《黑之章》除咗仍然以《DeadorAlive》系列出過嘅忍者RyuHayabusa擔正做主角外，更加入好多新角色，筆者試過多個角色，發現雖然遊戲主線劇情相同，不過會出現唔同嘅細微枝節，而且難度似乎都有所不同，視乎角色能力值，據聞遊戲有機會出現隱藏人物，當然神秘人要等爆機先會出現！
另外，今集亦加入咗多個新版圖同Boss級大佬，除咗難度提高，最過癮重係喺劍同飛鏢以外，重可以用多種唔同武器，如雙截棍、戰斧及巨劍等，其中有一版更會出現一個不知名武器，外形好似拳套一樣，攻擊時會發光，特別之處係攻擊速度非常快，好多時都可以殺到敵人無還手之力！
MasterNinja變態模式
通常遊戲都會有難易度俾用家選擇，一般3、4級係常見，今次2個全新難度「NinjaDog」和「MasterNinja」，前一個係俾新手試玩，會不斷提供道具輔助，玩過後包你話全無難度，另一個「MasterNinja」就真係一個非常人可以玩到嘅模式，輔助道具超少之餘，敵人難度更係倍升，連卒仔都皮厚血多，頂到去打大佬更係誇張，生命值成個畫面咁長，重要攻擊力超強，俾佢打一下，立即無咗3分1血，而且「唔公平」地重要有好多小兵，難怪有話連開發小組都玩唔掂，喜歡挑戰難度同反應者，絕對唔可以錯過呢個變態模式！即使一般模式內，間中會出現出人意表嘅敵人，如敵人竟然會出現揸機關槍、火箭炮、直升機等科技武器，忍者就要再次「唔公平」地用刀同飛鏢去應敵。
任務模式 敵人AI極強
唔想一版一版咁打落去，《黑之章》都有個新玩法，喺「Mission」內就收錄咗至少10個任務同大佬級Boss等機迷應付，其中一個必玩嘅係揸雙截棍嘅Boss，對住佢可以話遠攻近戰都束手無策，想走遠啲射飛鏢，佢用雙截棍竟然可以擋下來，有時重可以反彈過來傷害玩家自身；埋身攻擊更慘！俾佢打幾下扣大半血，認真刺激！
要對付佢要靠不斷跳躍及使用連續技，一經得手要立即遠離佢嘅攻擊範圍，萬一中招惟有不斷飲藍水補血，好彩房間有道具箱可取道具，玩家就要喺藍水用完之前擊倒敵人。至於一般敵人，尤其要注意着紅衫者，因為佢哋嘅AI特別醒，招式同攻擊方式好多，要隨時應變留神，而其他小卒多數先用飛鏢，拖慢佢攻擊，再衝上去就可以收拾。
遊戲資料
遊戲名稱：《忍者外傳：黑之章》
主機：XBOX
開發商：Tecmo
類型：動作
遊戲人數：1人
售價：$199
