前首席大法官楊鐵樑（圖中）噚日出席中大聯合書院獎學金頒獎禮，楊官退休後仍然不時講學，噚日佢亦都不吝賜教後輩，大講何謂法治。佢話一個社會成功唔係靠人、靠政府、靠錢，而係靠法治。
楊官認為，法治一個高層次信念，需要以人為重，喺法律基礎上尊重人嘅自由同權利，如果唔係以人為本，就唔可以叫做法治。楊官免費為大學生上咗一課，點知同學們疲態畢露，或者係太沉醉於法治嘅大義，好多人都聽到耷晒頭、合晒眼。
講開大學，今日係港大開放日，校長徐立之繼續與民同樂，繼舊年落手落腳𢳂雪糕畀啲學生食，今年會同啲學生一齊表演舞獅，但因為唔係太夠時間練習，所以只會表演舞獅中較為輕鬆嘅部份，譬如打鑼打鼓咁啦。徐校長重會講吓故事，講乜故事就賣關子先。
傳真︰2623-9278
電郵︰[email protected]