肥龍同皇仁龍輪住搶鏡，行會八新貴竟然話咁快就跌watt，幾乎冇人理，咁八方不如扒吓逆水，唔講兩條龍講吓羅仲榮。
八方鍾意睇電視，記得無綫有個羅仲炳，佢就係羅仲榮個阿哥。羅家做電芯起家，間寶號叫做金山實業，一九六四年創立，初時好細，但二十年後已經做到上市，現在有萬六員工，一年生產二十億粒GP電芯，又做Clipsal電掣，好巴閉，所以有人叫羅仲榮做「電芯大王」，肯定係真電池唔係舊電池。
同唐唐份屬友好
羅仲榮喺伊利諾理工學院讀完書，七二年就返嚟加入金山幫屋企做生意。嗰時做工業搵到好多錢，八九年佢同唐英年、林健鋒一齊攞到青年工業家獎，之後唐唐做工總主席，佢做副主席。唐唐退位，直頭由佢接任主席，可見兩人關係好深，如果話唐唐有馬房，咁羅仲榮可能係其中之一。值得一提係羅仲榮同九倉吳光正亦友好，重幫九倉集團做董事。
羅仲榮雖然係廠佬出身，但佢嘅嗜好就好高雅，就係收藏名畫，屋企大把齊白石張大千，聽講佢過年時會搵人印製藏畫月曆，分送友好，而金山嘅年報，亦有大量插畫，係非常靚嘅上市公司年報。受到老竇嘅影響，佢個乖仔細細個就跟嶺南派名師趙少昂學畫。
羅公子好搞環保
講到羅公子，佢叫羅揚傑，洋名Alan，喺普林斯頓讀建築，但就去咗做酒店。冇耐之前佢撞車，所以出晒名，係人都知佢同潘廸生個女潘楚穎拍拖。呢位公子，竟然走去搞環保。舊年金山喺惠州間廠有工人中鎘毒，羅家都算處理得好，又肯賠償又設立基金，唔知羅公子從中有冇出過力呢。
除咗Alan，羅仲榮重有一個女叫潔怡，在公司幫手。羅太太叫劉潔梅，好低調，連至八嘅人都話冇乜佢嘅料，有冇讀者可以提供吓？
傳真︰2623-9278
電郵︰[email protected]