好友朝早起身，眼見杜指隔晚散133點，心諗今日又試死得。點知恒指早段跌過99點後反彈，埋單計有78點進帳。但高興嘅人唔係好多，升市中，下跌股份比上升股份多出近6成。對沖基金做嘢，點樣做，普通人1個都估唔中。
和黃C輪4887：和黃（013）前日尾市表現奇形怪狀之後，早段再跌1.15元，收市則反升1.05元（最多升過1.10元）。早知幾個鐘頭嘅事，富貴萬千年。喺和黃兩個幾銀錢嘅即日波動過程中，和黃C輪嘅變化，令有啲人覺得好易搵食（叫做危中有機），有啲人覺得好易輸錢（或者叫做機中有危），睇吓炒家膽識同運氣如何。
危中有機嘅情形，係早段喺和黃最低時，以15.1仙買入和黃熱門C輪4887，到收市前以22.9仙沽出，52%利潤袋袋平安。
機中有危嘅情況，係周三揸咗4887，周四輸24%，昨晨最低時沽出，兩日輸4成。
4887𠵱家點睇？「炒上落」囉，亦即係賭大細。
江銅C輪：隔晚紐約銅價跌啲，但仍然係貼近歷史新高，不過江銅（358）股價跌4.9%。先幾日嗰市唔掂，江銅企硬，昨日補跌。結果3隻江銅C輪4759、4742與4877，大散50%至30%。3隻輪，都係11或12月夠鐘，溢價由12%至28%，全部都高危，其中4742最高危，行使價4.88元（正股造3.85元），6.2仙輪價只怕愈玩愈縮。
章盛