國金四季酒店（FourSeasonsHotel）噚日舉行開幕典禮，城中名人都去晒，搞到中環大塞車，有表演，有美食，重有維港夜景襯托，認真高興。
不過，有段比較蝦碌嘅小插曲，就係大會嘅音響系統喺最重要關頭失靈咗兩次，搞到主禮嘉賓唐司長企喺台上冇聲出，經過搶修後，開幕禮先至順利進行。唐唐大讚四季開得合時，因為啲遊客已經返晒嚟，況且有好多大型活動會喺本港舉行。
四叔李兆基就好開心，猛話個咪唔掂唔關四季事，係間音響公司嘅問題。佢同新地副主席郭炳聯都話，兩間發展商攜手投資興建國金整個項目，包括呢間頂級酒店，正好表示佢哋對香港前景充滿信心。
噚晚四季開晒成間酒店同啲朋友開派對，郭炳聯預告會有好多surprises，果然由入門口開始就有四個雜技人喺度表演，入到大堂當然唔少得優美嘅現場演奏，好有情調。四季集團創辦人Mr.Sharp專程嚟出席，佢話四季喺紐約、倫敦都有，𠵱家香港都開埋，三大金融中心，都有四季啦。
傳真︰2623-9278
電郵︰[email protected]
