根據黃玉郎同名漫畫改編的電影《龍虎門》，將於明年暑期上映。謝霆鋒、余文樂和甄子丹分別以漫畫主角的長髮造型演出，身兼動作指導的甄子丹對霆鋒和樂仔的武打要求非常嚴謹，霆鋒雖然有腰傷，但亦毫無怨言，並希望以真功夫示人。
由葉偉信執導，謝霆鋒、甄子丹、余文樂和董潔主演的電影《龍虎門》正拍攝得如火如荼，由於電影是根據漫畫家黃玉郎的同名漫畫改編而成，所以在造型方面製作嚴謹，希望電影漫畫化之餘，在張叔平擔任美術指導下，三位主角均長髮披臉，造型頹廢，與原著的剛強味道截然不同。
動作難度高
身兼動作指導、飾演王小龍的甄子丹對霆鋒和樂仔的動作要求特別高，甄子丹說：「我今次喺動作設計方面會多啲高難度動作，因為我覺得霆鋒同樂仔都有能力做到我嘅要求。我今次同霆鋒做兩兄弟，兩個人都係一身黝黑皮膚，好彩我哋都算黑，如果唔係就要去曬燈。」
飾演王小虎的霆鋒雖然有腰傷，但他拍攝《龍》片時仍非常落力，他說：「由於之前拍戲成日受傷，睇咗幾年醫生都未好，不過既然拍得動作片，都預咗會受傷或者會觸及舊患，但我會盡我所能去做，希望可以親身上陣拍晒成套戲。」
谷肌戴假髮
至於飾演石黑龍的樂仔的造型則是一頭銀髮（原著是金髮）及經常身穿背心，所以他在開拍前積極喼弗鍛煉肌肉，希望不會與漫畫相差太遠，樂仔說：「除咗霆鋒係真髮，我同甄子丹都要戴假髮，不過電影有唔少動作場面，所以打起上嚟成日會俾啲頭髮阻住同吹到亂晒。」
