借美股反彈個勢，港股高開，但有啲石堅格，恒指曾升過百五點，埋單只升36點。早段1個貪字買C輪，到尾市原來好易唔見10%。
股價好反覆，由長實（001）波動可以睇到。長實升過1元，最後則反跌25仙。短期內，大市仍然反覆，見高勿追C輪，見低勿買P輪。
新地C輪9059：新地（016）收報74.40元，升45仙，全日波幅得35仙。同好多藍籌一樣，新地暫時估計都係上吓落吓。
吼低位，買新地C輪，正路對象係9059，明年4月中夠鐘，輪價41.5仙，溢價6.4%，槓桿率17.9倍（有效8.6倍），引伸波幅25.2%。
熱門對象則係4904，呢隻波幅較大，昨日正股高低只相差0.5%，隻輪波幅已有13%。
輪價9.5仙，明年1月到期，溢價8.8%，槓桿率78.3倍（有效17.5倍），引伸波幅23.4%。
利豐C輪：利豐（494）昨升3.7%，恒指股升幅最大係佢。利豐C輪有3隻，全部冇成交，按盤價計則升6.8%至13.7%。
利豐C輪冇得炒，冇買賣得個睇字。估中正股都冇用，睇好正股，直接向正股埋手算數。
章盛