江欣燕日前偕夫吳積遜、胞妹江欣慈和父母齊在中環逛商場，又拉隊到超級市場掃貨，準備歎住家火鍋。其間江欣燕夫婦難忍肚餓，買麵包祭五臟廟，身為纖體代言人的她笑言當日破戒，鯨吞三千卡路里。
江欣燕日前與丈夫吳積遜、胞妹江欣慈和雙親齊往中環IFC商場共敍天倫樂，當日江氏一家先到酒店吃午飯，再到名店購物，尾站到商場內的city'super超級市場大肆掃貨，準備當晚闔家吃火鍋。
當晚七時多，戴帽的江欣燕與家人現身超市，其間眾人四散蹓躂，江欣燕夫婦先行往買麵包和橙汁，在超市門外咬包醫肚。
女入貨男閒逛
及後二人折返超市會合家人，只見江欣燕與母親和胞妹三個女人主力掃貨，當江欣燕步到急凍櫃前還興奮地說：「睇吓食乜先？」接着便買了菜、魚和凍肉等。江欣燕與母親又對沙煲罌罉甚具興趣，兩母女駐足在廚房用品櫃前研究一番。江父與女婿則在超市內自由行，大約半小時後，眾人集合付帳離開。
事後記者致電江欣燕，她在電話中說：「其實呢排我又忙，家人又忙，都有兩個月冇見過，嗰日大家有時間，就約埋上我屋企打邊爐。嗰日爹哋話去酒店食午飯，飲咖啡，已經成千卡路里落肚，跟住夜晚打邊爐食飯，又二千卡路里，爆晒燈，好彩我上個禮拜拍完纖體廣告啫。」
爆胞妹肥六磅
江欣燕又表示胞妹剛從美國返港，肥了六磅，她笑說：「佢都係咁食，不過有幫手洗碗，都乖嘅。其實𠵱家大家都大個咗，識得珍惜同家人一齊嘅機會。」
採訪、攝影：娛樂突發組
