昨日有戲迷傳真到本報投訴，指早前購買了為新光戲院籌款、於下周三（二十六日）上演的《帝女花》戲票，本是由梅雪詩（阿嗲）、龍劍笙和陳寶珠演出，然而近日卻獲悉原來阿嗲夥拍寶珠姐演出的《香夭》，將改由阿姐跟寶珠姐演出，令戲迷甚不滿。
可以退票
阿姐昨日就此事解釋說：「仙姐（白雪仙）一早有叫我做《帝女花》，但我話淨係識唱《香夭》啫，後來仙姐再搵人打電話畀我，叫我同寶珠演《香夭》，咁我都冇法子再推啦，我問佢寶珠有冇問題，仙姐又話完全冇問題，噚日阿嗲重教我同寶珠排戲，又借戲服畀我㖭！」
阿姐續說：「其實喺張票度印咗主辦單位有權調動角色，我只係代替演出《香夭》部份，阿嗲又唔係唔演出，如果戲迷唔滿意嘅話，大可以退票，我哋都已經貼咗告示喺戲院門口。」