到著名大廈開會，喺大堂碰到賓架Ａ，省起賓架Ａ嘅銀行就在樓上，問佢做乜企喺大堂？賓架Ａ話：「退休咗咯，做銀行做咗三十五年，重唔退休？想飲罰酒咩？」
賓架Ａ平素注重運動，讀大學時係足球隊主力，畢業三十五年，睇佢仍然雙目炯炯有神，頭髮濃黑，相形之下，皇馬嘅施丹睇落重老過佢。不過打工三十五年，點都夠皮啦，於是退休。賓架Ａ話現在與銀行舊同事組織咗一間顧問公司，舉凡財務管理、銀行營運（operations）、會計人事、市場推廣各方面，如有問題，都可以搵佢間大寶號做顧問。
賓架Ａ呢三十五年來，做銀行營運主管，由香港去到德國，去東京、去美國、去台灣，最後返到香港，經歷銀行幾次合併，可謂閱歷豐富到極。問佢最新嘅國際級銀行動態如何？佢話：「搬去印度囉。十年前我哋已經講，呢兩年真正落實，將啲operations嘅工作，盡量搬去印度，𠵱家啲租金咁貴，譬如呢間大廈每呎租金已經過咗七十蚊，就快升到一百蚊，銀行啲唔賺錢嘅後勤部門留響度做乜？營運部門搬得七七八八，我呢個阿頭不如退休啦。」
國際銀行後勤部門搬去印度，對寫字樓租金冇影響，但對本地人嘅職業結構就有，香港白領階級主要係文員，主要係中學畢業生、預科畢業生做嘅，左丁山先父就係一生做文員四十年，養大頭家，令左丁山可以讀完大學，做咗銀行officer，唔係clerk。文員係中產階層之中下層（上層係年薪過百萬，但未曾發達之行政人員），屬香港社會骨幹，銀行文員素來待遇唔差，𠵱家呢類職位流失去印度與內地，有如八十年代工廠職位北移。直至最近為止，香港過往幾年嘅薪酬結構係月薪三萬以上者，人數增加；月薪一萬以下者，人數增加；月薪一萬至三萬者，減少。換言之，爬唔到上去，就會跌番落嚟，搏命少啲都唔得。