早幾個月前因為打壁球拉斷右腳腳筋嘅陳淑蘭，雖然𠵱家已經唔使篤枴杖，但右腳重要打石膏。雖然行動唔方便，但蘭子依然愛夜蒲，前晚十點幾，馮仁昭又撞到佢同兩男一女去咗中環雲咸街——不過今次係蒲7—11便利店。
狂刨娛樂版
前晚十點幾，蘭子右腳跛吓跛吓咁同班朋友行入便利店，一入到去，四個人即刻企喺書架前面，蘭子一手攞起份報紙、揭去娛樂版係咁刨，重吸引埋同行嘅女性朋友一齊睇。至於另外兩個朋友都當正便利店係自己屋企咁，狂刨八卦雜誌，前後睇咗十五分鐘，之後各自擺番晒啲報章雜誌上架，再去雪櫃揀雪糕。
只見蘭子烏低身伸手入雪櫃勁摷一輪，終於揀到一個朱古力甜筒，佢一攞上手就嗱嗱聲撕開包裝、大啖吞落肚，佢身邊嘅女性朋友忍唔住同蘭子講：「你未畀錢喎！」蘭子先好似如夢初醒咁話：「係喎，拆咗喇喎，好想食吖嘛。」店員見到蘭子咁猴擒，都唔知好嬲定好笑，只好同佢講：「唔緊要啦，我攞第二個甜筒嘟番機啦。」蘭子畀錢之後率領友人大搖大擺咁上番佢架保母車走人。
