宣萱和郭晉安年前主演的無綫劇集《戇夫成龍》大收旺場，即將推出的《阿旺新傳》圍繞阿旺和老婆仔開甜品店的故事。宣萱表示郭晉安在劇中常炮製的芒果湯圓，其實用染色粉做成，並謂想起都恐怖。
由宣萱和郭晉安主演的無綫新劇《阿旺新傳》下周一推出，年前二人主演的古裝劇《戇夫成龍》收視斐然，郭晉安飾演的儍仔阿旺和宣萱飾演的老婆仔深入民心。阿旺和老婆仔在古裝版中整老婆餅，在時裝版中則會開甜品店整芒果湯圓。
入廚忘洗手
宣萱和郭晉安日前到何文田CookHouse跟導師學整西式蛋糕，這對老拍檔一見面即雞啄唔斷，整蛋糕時卻顯得雞手鴨腳，更乘機將忌廉弄污對方的臉，認真百厭！當二人整完蛋糕後，宣萱才赫然驚覺大家整餅前沒有洗手。
郭晉安表示女友歐倩怡近年專注學廚，年底更會推出食譜教人製作甜品，他說：「我最鍾意食佢整嘅法式焦糖燉蛋，佢有時一日整好多嚟練習，搞到我早排肥咗十幾磅，佢新書搵咗我同宣萱寫序，我叫佢不如開間咖啡室賣自己整嘅蛋糕，不過佢話唔想將興趣變成職業，我發覺女人通常都係咁唔實際。」
好睇唔好食
提到在新劇中經常出現的芒果湯圓時，宣萱和郭晉安不禁大笑起來，宣萱說：「諗起都幾恐怖，拍攝過程梗係好逼真，其實我哋食嗰啲係用染料粉做嘅，郭晉安最好彩啦，淨係負責整，成日都要我哋試食。」
採訪：卓美娟
攝影：陳志嵐
服裝：A/X
髮型：NikiLee/Headquater（郭晉安），Bluedy/HairCulture（宣萱）
化妝：Kaman（宣萱）
