政府標售嘅長沙灣郝德傑道46伙前政府宿舍，雖然對住無敵天主教墳場景，但係依然叫座，噚日連新地打工皇帝黃植榮都一行5人浩浩蕩蕩親臨視察。
一向慎言嘅黃董，對個盤嘅評價係：「你都見啦，前面『咁靚』，要返去計吓數先。」言下之意，似乎對個墳景有啲保留，不過佢老兄日理萬機，都花咗近半個鐘左睇右睇，話冇興趣都冇人信啦。
另一發展商萬泰周國材，睇完就大讚嗰度環境好，幾分鐘車程去到九龍塘，地勢夠高又可以望到海景，喺市區好少有；至於墳景可以用建築設計就番，隔籬嘉珀山都望到墳，大單位呎價咪照樣過萬。佢反而擔心有兩伙賣散咗，收樓會增加發展成本。
據悉，新世界同嘉華地產都有派人睇過。
電郵地址：[email protected]