吳浩康（Deep）、官恩娜、鄭融和楊千嬅等一班歌手噚日到上水鳳溪公立學校出席「禁毒滅罪耀北區2005－激勵日」分享會，重即場同五百名青少年宣誓將自己嘅缺點除掉。
決心戒急用忍
不過噚日嘅焦點就落喺身份尷尬嘅Deep身上，佢去年因藏毒留案底，近日又再涉及夜店傷人嘅官司，馮仁昭就覺得佢嘅形象似乎唔多適合宣傳呢個訊息，不過人誰無過，Deep亦都唔介意人哋舊事重提，重喺會上語重心長激勵青少年話：「如果學運動係為咗打人，咁就唔好學，暴力係解決唔到問題，只會創造問題，總之『忍一時之氣，免百日之憂』。」
Deep嘅經歷亦都冇影響到佢嘅受歡迎程度，反而重吸引咗唔少學生爭相同佢合照，令佢都放下心頭大石。Deep同馮仁昭講唔會覺得尷尬，因為如果佢嘅經歷可以幫到年輕人，佢亦唔介意俾人做借鏡，總之無論件事係啱定錯，Deep都已經衝破心理關口去面對。
反而Deep同馮仁昭講𠵱家最想戒掉嘅就係「冇手尾」嘅缺點，因為佢已經因為呢個缺點而整唔見三張智能身份證嘞。
