舖位租得好，價值自然高，市淡唔例外，投資老手羅家寶，幾個月前用五千萬，買入旺角花園街九十八號舖，地下連閣樓各千呎，鞋店WalkerShop，原本租開十八萬，最近續租，大加近四成，新租二十五萬。市場人士傳言，附近大中體育用品公司，見租得咁貴，拿拿聲以五千八百萬接貨，自用又好，收租都唔只五厘。舖價咁就驟升一成六。
美記盧展豪證實單deal做咗，不過買家唔係大中而係投資者喎。
另外，中記朱志健話，西環德輔道西三八○號，全幢四層高商住樓，以千八萬賣出，買家亦係睇中租金回報高逾五厘。
佢話，幢樓五千呎，三千幾蚊呎，算合理，業主月收七萬六，其中大福證券最近以五萬，租用地下千四呎舖，比舊租高成倍，令回報更吸引。
電郵地址：[email protected]