行會新貴夏佳理噚日喺山光道馬會會所請新聞界食全蟹宴，夏馬王梗係唔認係為慶祝佢更上一層樓而請客，馬會大公關解釋話事有巧凑啫，皆因個師傅同啲大閘蟹都係上個星期先抵港，咁啱上周三煲呔發表施政報告，於是順延一周，點知撞正肥龍喺立法會讀政改方案，真係好彩。八方唔想知真正原因，總之有靚蟹食又可以問行會準成員攞料就得啦。
馬王開盤賭政府方案
叫得做全蟹宴就真係由頭盤、到翅、到包都有蟹，蟹腳、蟹拑同蟹粉都食晒，夏主席知道各位傳媒高層都食到心掛掛，所以特別開着個有線電視畀大家睇立法會現場直播，認真服務一流。而佢自己就攞住本剛收到嘅報告，先睹為快。八方一邊食，一邊聽夏主席品評啲議員問得公平與否，尖銳與否，非常過癮，真係難為肥龍同班議員，為民主要捱肚餓。
肥龍噚日話自己係務實民主派，夏馬王亦叫自己做民主派，八方問佢要唔要澄清，佢話梗係唔使，佢重同啲傳媒開盤口，問有幾多人買政府嘅方案可以唔使改就原裝通過，結果新聞界對肥龍好有信心，二十幾友中只有兩個買要改先至過到，於是夏馬王就開過一賠十嘅賠率，問有冇人肯落注。
八方當然係買個方案要改先通過，因為呢個世界邊有咁順攤嘅事情，況且目前嚟講，政府要攞四十票真係談何容易！
肥龍一答完問題坐低，大家就問夏馬王點睇？主席一本正經話，「煲呔同肥龍兩兄弟都算有啲功夫」，又話𠵱家個政府同董生好唔同，比較集中、有重點，當然肥龍好似唔緊唔緊，其實就好似鋤大Dee咁，唔好畀人睇到Dee仔底嘅底牌。
咁究竟夏馬王點睇民主派要求嘅時間表同取消委任議席呢？佢話取消委任，十五年前講就有意思，時至今日講時間表都冇用，最緊要係配套，取消咗功能組別後點搞，係咪搞兩院制？
咦，乜咁似肥龍講嘢？夏佳理反問，如果個方案唔過會有幾大影響？大家都話冇嘅，咪原地踏步，肥龍下台囉。佢一聽到肥龍要落台就好緊張，問佢係咪真係咁講過？知道肥龍冇公開表態，就放心得多。其實肥龍之後喺記者會都話唔會因為政改唔過而下台。
食完蟹，夏馬王只係講咗一句叫大家繼續支持。咁支持馬會抑或行會？佢就故意賣個關子，話唔講啦，大家心照啦。
傳真︰2623-9278
電郵︰[email protected]