馬時亨早前同民主黨輸賭，話詹培忠一定唔會參加立法會珠三角訪問團，結果金勞詹就令肥馬輸咗餐飯畀民主黨。輸咗就梗係要兌現承諾啦，肥馬亦都好守信用，早前已經去信民主黨各大友好，邀請佢哋出席十一月七號，喺鯉魚門設下嘅晚宴，還佢第一場債，屆時「幕後白手」飛哥都會出席。
一向鬼馬嘅肥馬，喺信中都貫徹佢搞鬼作風，例如話自己雖然「大破慳囊」，但都好開心，因為好高興金勞詹可以參加呢個「和諧之旅」；但佢又不忘講笑話，諗落都係贏家馬丁開心啲，但又叫馬丁同一眾議員放心，話呢個唔係「圈套」，自己提出邀請，只係想大家增進友誼，總之絕對唔係阻礙佢哋實現瘦身大計嘅圈套喎。
傳真︰2623-9278
電郵︰[email protected]