又係窩輪輸家通街走嘅1日，恒指一跌又係嚿嚿聲，是日又散兩嚿幾。跌幅逾3成嘅窩輪，超過50隻，當然主要係啲高溢價或高槓桿率嘅C輪。升幅逾3成嘅窩輪，有14隻，全部係P輪。
33隻恒指股，獨係裕元（551）有進帳，但亦只係升得1格。
恒指窩輪：港股總成交197億元，窩輪佔36億元，佔總成交18%。36億元窩輪成交中，有22.3億元係恒指C輪與P輪，C輪對P輪嘅成交大約係1.6比1。
恒指昨收14372，悲觀少少嘅睇法，有機會落到14200，然後反彈，不過彈起上嚟有幾多水位，好難講。
恒指買跌，可以揀P輪9179，明年1月26日夠鐘，輪價19仙，溢價2.1%，槓桿率19.9倍（有效11.9倍），引伸波幅17.1%。
恒指買反彈，可以揀C輪3462，年尾夠鐘，輪價14仙，溢價3.5%，槓桿率30.2倍（有效15.5倍），引伸波幅19.2%。想賭得更狼，贏與輸放大啲，則揀9004。
無論賭C輪與P輪，最好有思想準備，擺10萬銀落去，隔1晚，可能變12萬銀，亦可能變8萬銀。
想賭錢，使乜過大海？
章盛