杭州就嚟有兩個西湖？冇錯，杭州當局已決定咗投資二十五億元人民幣，將面積與西湖相若嘅南湖滯洪區建成第二個西湖，變成另一個旅遊勝地。新西湖距離杭州市十八公里，原本係一個有一千七百年歷史嘅天然水庫，以前淨係用來防洪。新西湖嘅整治工程前日已經奠基，估計出年其中一個沿堤而建嘅五公里長閒林灣銀色沙灘水公園就會建成。