大市又跌二百幾點，嚴重打擊投資者的炒股意欲，小初亦唔例外，現時惟有見步行步，就算落場都唔敢太大注碼。
早前受Ba叔事件影響的東成控股（735），股價在急跌一大輪後，昨日逆市急升17.61％，收0.187元，成交股數4526萬股，金額818萬元。
經紀陳話，隻股雖然傳有動作跟尾，聽講重話會好快落實，但家陣市況咁差，加上特別唔利細價股，所以都係睇吓算啦。
經紀陳話，東成之前有幾個古仔，首先就係同中科環保（351）合作，跟住重傳埋中電國際會入股，但家陣唔使多講，都知呢支歌仔冇得唱。
另外，東成又話會收購北京物業，聽講呢單嘢如無意外，應會好快落實，但橫睇掂睇，呢單消息照計刺激有限。
況且，東成供股後，加上早前股價大跌，令街貨多咗唔少，所以噚日股價上升，似乎係技術反彈多啲，無謂再憧憬。
至於中科環保方面，雖然遭逢大變，但江湖傳聞有關人等正在努力謀求公司復牌。
慕容小初