成為知名人物，私隱肯定無法百分百保存，就算冇狗仔隊跟蹤，的士司機都會好多嘢講，好似一位「城市論壇」主持坐的士，一上車，司機就對着天地線講：「我載緊城市論壇主持過海呀」，都唔知有幾多的士司機收到料。如果主持人拖住個靚女明星，咪好快傳到去《壹仔》八卦欄？
呢日碰到公關靚女Ｅ，佢話一次到陳任屋企食飯（陳任好客，專門招呼老友食陳家菜，陳任識講又識煮），食完之後，朋友盡興告辭，陳任送靚女Ｅ搭的士。一上車，司機就同靚女Ｅ講：「陳任咁好請你食飯呀？佢好多朋友㗎，我見過陳百祥同黃杏秀拖住狗仔上去，譚校長又到埋，唔知係唔係食完飯夾吓band呢？」靚女Ｅ都唔知點樣回答好，碰上呢類司機，講多錯多，收口最好。
名人Ｃ本來話要我哋搭佢架順風車返中環，左丁山同佢開玩笑：「坐你架車會唔會俾人影相㗎？都係咪咯。」名人Ｃ大笑：「我行得正企得正，邊個敢影我？」呢個世界好難講，食飯嗰陣，名人Ｃ話唔少人俾人秘密跟蹤，懵然不覺，到咗後來，先至知道自己去澳門唱Ｋ，去名店食飯，與邊個往來，一一被攝入鏡頭，辦公室電話全部俾人竊錄，百思不得其解。最後水落石出，自己六個月前刊登招聘廣告請番嚟嘅總務部文員，原來係無間道。
據名人Ｃ講，唔少娛樂場所，都有形形色色，不同種類嘅無間道，防不勝防，成為名人就要小心為上，在公共場所，動作唔好大聲大氣，動作唔好有暗示性，例如朋友畀一個信封你，你迅速擺入西裝內袋，呢種動作，如果出咗事，有排解釋。
聽名人Ｃ講嘢，幾乎食唔落飯，感覺到BigBrother無處不在，相比之下，娛樂名人版嘅狗仔隊，影吓相，見吓報，好可愛啫。做生意，出嚟應酬，最好做到水清無魚，純潔過天使。