講起D-SLR,好多人都會覺得又重又大部,不過OLYMPUS最近推出嘅一部全球最輕嘅D-SLR—E-500,齋Body重量只得435g咁輕,就算加埋鏡頭都分分鐘輕過好多ProsumerDC,以後要做個專業攝影師,都可以做得「輕」鬆啲!
記者:梁瑋瑜
攝影:楊錦文
ImageGirl:Jasmine
講到E-500嘅另一賣點,當然係$7,980嘅價錢,連晒一機兩鏡啦!鏡頭都係使用E-300玩開嗰兩支14-45mm同40-150mm,實際焦距為28-90mm及80-300mm,好實用!據行家報料,以同級D-SLRKit裝鏡嚟講,佢都算係有數一數二的「高度評價」!基本玩家一機兩鏡在手,要再買鏡嘅機會都好微!至於價錢定位方面,熟行情者都會發現E-300同E-500嘅兩鏡Kit裝定價好相近,不過E-500機款較新,兼新加入CCD除塵濾鏡,同加大至2.5"大芒,咁就梗係好易令人貪新棄舊!


2.5"大芒D-SLR
出產入門級D-SLR,OLYMPUS早有前科,上年推出嘅E-300大受用家歡迎,今次再推出新型號E-500,採用較為傳統嘅外形設計,感覺較為大眾化,不過記者就鍾意舊款E-300較獨特嘅設計多啲,有番啲與眾不同嘅感覺。
E-500之所以咁輕,係因為外殼選用咗強化玻璃纖維樹脂,呢種質料唔單止耐用,手感亦都唔錯,此機亦配備咗目前D-SLR機裏面「最大號」嘅2.5"顯示屏,睇相嘅效果非常好,不但夠大夠清楚,而且有21萬像素,影像夠晒細緻。




CCD內置除塵濾鏡
E-500配有一枚有效像素為800萬像素嘅全幅式(FullFrameTransfer)CCD,最高可以拍攝解像度為3,264×2,448嘅相片,而ISO最高可以去到1600,配合喺高ISO會自動開啟嘅雜訊過濾裝置,比舊型號可以有效咁減少50%雜訊。
另外E-500亦內置咗獨家嘅超聲波除塵濾鏡,可以每秒震動三萬次,有效咁防止CCD表面出現嘅灰塵問題,對於需要經常更換鏡頭嘅D-SLR機,係一項非常實用嘅功能。記者試用E-500時,覺得操作上始終都有OLYMPUS一向以來唔太User-Friendly嘅問題,不過拍攝質素算唔錯,可以將功補過。




試相區


Profile
感光元件:889萬像素CCD(17.3×13mm)
顯示屏:2.5"TFTLCD(215,250像素)
儲存媒體:CF/xD
尺寸:129.5×94×66mm
重量:435g(不連電池及鏡頭)


同場加映
SP-500ULUltraZoom
10倍光學變焦
SP系列係OLYMPUSDC裏面半專業級產品(過往產品包括C-7070、C770等),今次推出嘅SP-500UltraZoom擁有10倍光學變焦ED鏡頭,焦距由38mm至380mm,不過不設防手震功能,Zoom得遠時就要靠用家手夠定喇!
此機內置距離追蹤對焦(PredictiveAF)系統,可以預測移動中嘅物件喺快門開啟時嘅正確位置,從而準確對焦。SP-500UL配備一枚有效像素為600萬嘅CCD,可以拍攝JPEG及RAW格式嘅相片,而顯示屏就有2.5",機身只係重285g,喺高倍數Zoom相機嚟講算十分輕巧,方便攜帶。

Profile
感光元件:1/2.5"637萬像素CCD
光學變焦:10×
顯示屏:2.5"TFTLCD
儲存媒體:xD/內置10MB
尺寸:105.5×74.5×71mm
重量:285g
OLYMPUS(23762150)


SP-350
輕巧半專業機
對於200g左右嘅機仔,大家可能對佢嘅功能冇乜要求,但係呢部SP-350就畀到大家好多驚喜,此機可以拍攝800萬像素嘅相片,有5倍光學變焦,而且重有自動、光圈先決、快門先決與手動曝光多種拍攝模式,與SP-500UL一樣可以拍攝JPEG及RAW格式相片,重設有Hotshoe可以外接閃燈!
外形雖然係一部機仔,但實際上有齊半專業相機嘅功能。SP-35係用xD卡作為儲存媒體,相比其他媒體雖然冇咁普及,但跟機已經送一張512MBxD卡,相信對於大部份用家已經夠晒用,唔需要再額外買卡。

Profile
感光元件:1/1.8"830萬像素CCD
光學變焦:5×
顯示屏:2.5"TFTLCD
儲存媒體:xD/內置32MB
尺寸:99.5×65×35mm
重量:195g


CREATIVEZENVISION
3.7"靚芒PMP
CREATIVE最近推出咗一系列以彩色屏幕作為主打嘅PMP及MP3機,其中最矚目嘅係擁有3.7"顯示屏、內置30GB硬碟嘅ZENVISION,此機嘅顯示屏有26萬色,解像度高達640×480,記者試用嘅時候發覺呢部機同一般PMP嘅芒真係好唔同,對比度十分之高,對於追求視覺享受嘅用家絕對不容錯過。
ZENVISION設有CF讀卡器,方便用家用嚟過相,大家重可以選擇廠方提供嘅記憶卡轉換器,直接讀取SD、MS同xD卡,功能方面當然包括播片、睇相、聽歌、FM收音機等,十分齊全。咁多功能嘅PMP,厚度都只20.1mm,外殼重有黑色同白色兩款,拎出嚟都夠晒型仔。

同場加映「激」細PMP
同場推出重有嘅ZENMicro升級版ZENMicroPhoto,改為使用彩芒及內置8GB記憶體;另外亦有內置512MB及1GB快閃記憶嘅微型PMPMuVoVidz,雖然顯示屏只有1.18",但勝在33g夠晒便攜,拎出街最方便。
記者、攝影:梁瑋瑜
CREATIVE(23312930)

