秋風起，涼涼哋，雖然𠵱家未到深秋，但都係時候拎啲秋、冬季衫出嚟Check吓有無穿有無爛，順便清潔一番，萬一忽然翻風轉冷，拿起手都有得着。眾多厚衫中，尤以皮褸同冷衫最難打理，前者容易惹塵，放耐咗會缺乏光澤，後者則毛粒頻生，難於清洗。最討厭嘅係拎出嚟啲衫一大陣樟腦味，真係令人百般難受。究竟有乜方法搞掂啲冬天衫呢？哈！原來蕉皮都可以擦亮皮褸，用雪櫃除臭劑可吸走難聞的樟腦味；今日一於學懂呢啲小秘技，令秋冬衫以最佳姿態重新登場。
記者：葉靜君 攝影：周旭文
模特兒：Bowie＠Coolfactory
蕉皮擦皮褸 去污兼變亮澤
成日都覺得着皮褸好型，百搭又襟興，不過，買件靚皮褸閒閒哋過千，當然要勤加保養，錫住佢啦，Keep得好可以着番三五七年。要對付皮褸上的污迹，可用皮革專用清潔劑，之不過，原來食剩的香蕉皮，都可以廢物利用擦令你件皮褸；皆因香蕉皮含有丹寧成份，可擦淨污垢，更可增加皮革的亮澤度。
其他護理貼士
皮革最忌係水，一旦弄濕好容易會發霉，遇水時應盡快用乾布抹乾，事關皮革吸水性強，遇水變黑，嚴重時更會脫色或變硬，好恐怖！
雪櫃除臭劑辟樟腦味
存放衣物時都會將樟腦或臭丸放入衣櫃裏，可以防止昆蟲蛀蝕衣物，之但係佢哋有一股強烈的氣味，當你喺衣櫃度拎啲衫出嚟嘅時候，呢種氣味同時依附喺衣物上，即使放在通風處吹，異味亦難揮發，真係要即時掩住個鼻，重要着住出街，真係臭死自己同埋隔籬嗰位！要短時間去除臭味，可以用雪櫃的除臭劑喇！
蒸熨去冷衫摺痕
冷衫可以講係冬天最常穿的衣物，當經過半年放喺櫃桶被其他衣物積壓，少不免有摺痕出現，甚至受壓而變形，用蒸氣熨斗可以熨平回復靚樣。
其他除味方法
其他護理貼士
橄欖油變柔順劑
部份人喜歡將冷衫再清洗一次先至着，之但係放落洗衣機洗則死無全屍，小事則縮水，大事則變形，究竟點清洗先至啱？
消除毛粒
冷衫最乞人憎的地方就係成日起毛粒，特別係捲曲部位因摩擦而起了不少毛粒，但係大家千祈唔好貪方便，就咁直接掹走啲毛粒，力度太大分分鐘會搞到件衫變晒形。
