立法會資訊科技及廣播事務委員會噚日開會，一如所料，喺冇咩好講嘅時候，好自然又會跳咗去講小眾電台──一個八方聽咗N次，但都認為冇可能會實現嘅嘢。今次扯起話題並唔係極喜歡呢個題目嘅卿姐，亦唔係以前喺電台開咪搵食並聲稱𠵱家冇嘢撈嘅鄭經翰，反而係新晉報人湯家驊大律師。佢問曾俊華，香港得三間電台，「喺香港電台俾政府整治到體無完膚、新城都唔好得去邊度」嘅時候，政府究竟有冇政策去容許更多業餘聲音或者電台？曾局長答得好簡單，政府係重有兩條AM頻道可以用，只要符合牌照要求（其中一樣係財力），佢歡迎A45申請。而湯大狀就回應話，根據佢太座嘅講法，佢財力一定唔得。呢個回合大家得啖笑。
咁鬍鬚曾個副手副秘書長黎陳芷娟又答成點呢？佢一開聲又係「頻譜係寶貴資源一定要好好善用」呢句適用於任何場合嘅modelanswer，又強調「香港已經有好多發表意見嘅平台……」，於是俾大班喪串，叫佢介紹份工；八方只可以講，為官者除咗個樣要有官威，最緊要係講嘢經大腦啊！
八方早前報過阿牛想試播，被當局拒絕，重分分鐘被人告佢非法廣播，點知峯迴路轉，阿牛噚日收到廣播事務管理局秘書嘅來信，話正處理佢十月六號申請試播，並會盡快回覆喎。
傳真︰2623-9278
電郵︰[email protected]