商業社會，各行各業都競爭激烈，做地產代理，爭生意之餘，重要鬥市場佔有率、鬥見報、鬥面子，總之鬥贏行家。呢幾年，發展商興用經紀促銷，運用佣金獎金「萬誘引力」，促使代理搏命。
信和大角嘴一號銀海，喻為近期最能夠發揮經紀效力嘅新盤，皆因個盤只不過賣咗兩個幾禮拜，就賣出八成，逾五百七十伙，銷情咁好，發展商與代理自然開心。信和韓家輝話，個盤套現六十幾億，如果以經紀收兩個佣計算，發展商淨係畀佣，都超過一億。
噚日，發展商慶祝銷情報捷，喺奧海城售樓處對開空地，搞頒獎禮，以「太公分豬肉」形式，頒發十幾個獎項，四間代理行間間有得分。各行陣容龐大，台上攞緊獎、台下等攞獎，都花招多多，一味霸頭位，搶佔有利位置。
電郵地址：[email protected]