煲呔委任八大漢入行會，有高人睇完張名單，第一反應係四個字──李家天下；呢個判斷八方絕不懷疑，不過，其實查家都好巴閉。
查濟民旗下上市嘅香港興業公司，係愉景灣發展商。八新貴之中，夏佳理係該公司非執行董事，張建東係獨立非執行董事；史美倫雖然唔係董事，但就係查家媳婦。一個行會，三個查系人馬，你話點頂？
升空物品有集團標誌
查濟民有幾威，講兩件嘢就知。當年鄧小平要收回香港，想聽意見，第一批接見嘅香港人就有查濟民；查濟民當基本法起草委員，第一時間提一個最保守嘅政改方案，後嚟查良鏞加入戰圈，先至出現雙查方案。
新近嘅就係神舟六號，搭載升空物品中，有查氏集團嘅標誌。如果唔係空間技術研究所飛船設計顧問戚發軔親口對記者講，八方都唔知查濟民個基金會一直好支持中國嘅航天事業，所以邊個嘅物品都可以推，惟有查家要畀面。
咁查家都有啲嘢做唔到，就係香港興業搵唔到人做獨立非執行董事，竟然要向交易所攞人情。你話如果夏、張兩人避嫌辭埋職，咁咪有排煩？
半數新貴同港大有關
除咗查家，行會八新貴當中，半數同香港大學有關係，李國寶係港大副校監；梁智鴻係港大校務委員會成員，范鴻齡則為港大司庫，佢兩人以及張炳良都係港大舊生（寶哥哥讀劍橋）。
記得老董幾年前喺港大慶祝八十周年晚宴上提出「新精英主義」，八方當晚聽到眼定定，事關出身殖民地時代最高學府嘅人一夜之間被打成「舊精英」，以政治血統論去分析，班「舊精英」喺董建華政府冇運行；直至殖民地官僚系統嘅煲呔掌權，一眾前朝精英紛紛回朝。
港大今次算係威番次，公開大學亦唔失禮，因為其他新成員中，李業廣係公大校董會主席，張建東則係校董會成員，佢又係科技大學校董會副主席，另一新貴羅仲榮係理工大學校董會主席。舊人當中，「班長」梁振英係嶺南大學校董會主席，陳智思係嶺大校董會副主席，曾鈺成係公大校董，周梁、廖長城同曾鈺成都係港大舊生，史美倫係科大校董。城大有個新丁張炳良……邊個話政府唔重視教育？只不過，八大院校中，中大、浸大同教院唔覺有代表喺行會！
傳真︰2623-9278
電郵︰[email protected]