大市牛皮，恒指高低波幅得64點，埋單進帳56點。中移動（941）、中海油（883）與長實（001），總共扯高恒指48點。喺大藍籌幾個價位變化中，炒輪搵食，非常困難，得閒行吓街好過，可能重慳皮過炒出炒入。
九倉C輪9061：九倉（004）是日上升65仙，升幅2.4%，恒指股表現最叻嘅係佢。唔使問有乜消息，早前由30.95元撻落嚟，低見27元，因超賣而技術反彈就係理由。
九倉C輪有3隻，末日輪3846彈升19%，收28仙。隻輪溢價0.2%，槓桿率9.9倍（接近平水窩輪，唔使理有效槓桿率同引伸波幅），睇落唔錯，但睇埋成交金額得兩萬幾，同埋下周二最後買賣，隻輪冇得搞。9061明年3月尾夠鐘，輪價20.7仙，溢價8.4%，槓桿率13.4倍（有效7.4倍），引伸波幅26.9%，數據勉強過得去，不過交投太靜，得29萬銀易手，而昨日升幅又達20%，買唔買都冇乜所謂。
華創C輪3431：華創（291）升2.1%，恒指股升幅第2叻嘅係佢。華創C輪4隻，其中3431睇得吓，明年5月尾夠鐘，輪價18.9仙，溢價5.1%，槓桿率6.6倍（有效4.8倍），引伸波幅30.9%。限於爆炸力有限，發達唔易，搵餐茶唔難。
章盛