政府唔知係咪為咗要沖淡今日發表嘅政改五號報告書，噚日忽然由唐唐同商務部副部長廖曉淇一齊宣布，簽訂咗CEPA明年生效嘅第三階段協議，所有港貨都零關稅。今次唐唐可謂三喜臨門，除咗CEPA，本港失業率跌到四年來新低，佢重成為最高民望嘅司長㖭。
不過，八方班老友對CEPA安排興趣不大，反而聽到廖曉淇話安民因年齡關係已退休，𠵱家有關工作由佢接手，就拍爛手掌。
大家都記得安民當年戴住個黑超，破口大罵馬丁去美國係賣國，連馬丁死鬼老竇都鬧埋，話佢由阿爸開始已經同共黨鬥爭。此語一出，搞到北京都好尷尬；馬丁亦冇法唔反擊，話佢鬧錯人，皆因佢阿爸後來都幫過共產黨。
八方問馬丁，聽到安民退休有乜反應？佢話，「咪祝佢安安樂樂、開開心心過活。」馬丁話唔識安民，所以冇乜好講喎，真係大人有大量。
傳真︰2623-9278
電郵︰[email protected]