眾人媽打李麗娟噚日開始佢退休後第一日嘅生活，不過，一打電話畀佢，就知佢重喺辦公室清緊電郵同執包袱。媽打話，做咗三十四年公僕，原來都儲埋好多嘢。
至於前晚煲呔嘅家宴，媽打話食到好感動，因為特首夫人預先張揚會親自下廚煮雞同佢送行，原來係古法鹽焗雞（好彩媽打係自己要走，否則重以為曾太整隻無情雞佢食）。
至於大閘蟹就冇得食，因為曾太知佢老公同媽打有痛風症，唔食得蟹。
媽打對呢道客家名菜特別受落，皆因佢係客家人，曾太實在好有心思。前晚嘅賓客除咗有鍾士元、鍾逸傑、陳祖澤、王䓪鳴、蘇海文夫婦等媽打友好之外，重有媽打第一位上司──李國能嘅父親大人李福逑。
唔講唔知，煲呔真係「復辟」舊制，因為以往有資深AO退休，總督都會請佢同埋佢班好朋友食餐送別飯，煲呔照辦煮碗而已。
傳真︰2623-9278
電郵︰[email protected]