噚日本報報道徐子珊日前睇完黎明個唱，喺後台被對方拒見，改而夜會陳姓富家子撐枱腳示威。經進一步查證後，發現原來呢位陳生出自名門望族，非常叠水，Benz跑車出入、家住深水灣道豪宅。
呢位陳生叫Conrad，今年三十四歲，係鷹君集團創辦人羅鷹石嘅外孫，媽咪係羅鴻鏇，老竇係陳維廉，阿爺陳漢華就係鉅發源米行創辦人，換言之Conrad係米王嘅乖孫，而宣萱牙醫舊愛陳建緯重係Conrad嘅堂兄弟㖭。
而Conrad老竇開嘅公司，早排攞咗由韓星權相佑擔任代言人嘅韓國化妝品牌TheFaceShop嘅香港代理權，Conrad喺加拿大畢業返港後，就幫阿爸打理公司業務，唔知佢嗰晚約會徐子珊，有冇順便斟吓拍廣告呢？
楊采妮喪笑
另外，呢排傳出為黎明而同徐子珊爭風呷醋嘅楊采妮，對於徐子珊約會叠水新歡一事，噚日佢喺中環接受訪問時就笑唔停，重問記者係咪同佢講古仔，楊采妮話：「我冇睇報紙，唔知呀，我唔係徐子珊，唔知佢點諗，又唔識佢，唔會多作評論，希望大家開開心心啦！」
