煲呔復舊制，想學肥彭搵個韓新（Hanson）式人物做新聞統籌專員（IC），同佢收料同放料。不過，呢個位唔易搵人做。八方聽聞，煲呔重未有適當人選，於是有人建議煲呔應該搵個非公務員，咁就可以同外界更接近，結果幫過佢競選嘅黃麗君未肯制，又出咗打書釘劉細良（圖）個大名。
八方噚日問細良，佢不但冇否認，重好小心翼翼咁講，「暫時無可奉告」。咁煲呔有冇搵過佢呢？一樣無可奉告，真係事有蹺蹊。八方忽然記得上周三佢突然喺立法會出現，坐喺二樓好留心聽煲呔讀施政報告。
不過，當八方向官場中人查詢，佢哋竟然嘩聲四起，話冇可能。識細良嘅就形容佢老哥好有橋，觸覺敏銳，反應快、口才好，咦，咪好啱傾？之但係佢曾經同白鴿黨打過工，亦做過肥佬黎手下，𠵱家佢喺商台開咪，係超人紅顏知己周小姐頭馬，咁周小姐點睇呢？
傳真︰2623-9278
電郵︰[email protected]